- Касбим тақозоси билан тез-тез Урганч шаҳрига боришга тўғри келади. Ана шундай пайтда олдинлари троллейбус хизматидан кўп фойдаланганман. Чунки мен учун у қулай бўлган. Бироқ, айрим сабабларга кўра Урганч-Хива-Урганч йўналишидаги троллейбуслар қатнови тўхтаб қолган эди.
Мана бугун, 1 мартдан бошлаб “Урганч-Хива-Урганч” йўналиши бўйлаб троллейбуслар қатнови яна бошланганлигини эшитиб, ўзим, оила аъзоларимиз янада хурсанд бўлдик. Чунки, троллейбусга мингач унинг ойнасидан тобора чирой очаётган қишлоқларимиз ва уларда амалга оширилаётган бунёдкорликлар, мевали ва манзарали дарахтлар, гулзорларни, хиёбонларни, яшиллик оламини кўриб, қалбимиз янада қувончга тўлади.
Вилоят ҳокимлигининг ташаббуси, амалий ёрдами билан “Урганч-Хива-Урганч” йўналиши бўйича троллейбуслар қатновининг яна йўлга қўйилганлиги барча элдошларимизни хурсанд қилмоқда, - дейди журналист Сайёра Солаева. – Бу, элдошларимиз учун баҳорнинг илк кунидаги ажойиб совға бўлди. Бундан жуда мамнунмиз. Бундан кейин ҳам ушбу хизмат туридан ҳар куни фойдаланаман.
Ҳа, шунингдек, Розияжон Худойназарова, Отабек Исмоилов, Марямжон Аминова, Акбар Бобожонов, Озод Абдуллаев ва яна бошқа кўплаб элдошларимиз Урганч шаҳридан Хива шаҳрига троллейбус қатновининг йўлга қўйилганлигини мамнунлик ва қувонч билан қайд этишмоқдалар.
Йўлларимиз эса асфальт қилинган. Кенг ва равон. Ҳар қандай йўловчининг узоғи янада яқин бўлади.
Баҳорнинг илк кунидан воҳамизда қалбларни севинчга тўлдираётган янгиликлар, эзгу ишлар янада кенг қулоч ёймоқда.
Отахон РАҲИМ.